गुलरियामा चितुवाको आक्रमण, एकजना घाइते

स्थानीयवासीमा त्रास फैलिएको छ। वन्यजन्तुको आक्रमण बढ्न थालेपछि सम्बन्धित निकायलाई नियन्त्रण तथा सुरक्षाका लागि पहल गर्न स्थानीयले माग गरेका छन्।

अफजल खान

गुलरिया, फागुन १४ — गुलरिया नगरपालिका वडा नम्बर ७ चौगुर्जी गाउँमा चितुवाको आक्रमणबाट एकजना घाइते भएका छन्।
आज बिहान करिब ६:३० बजे खेतमा गहुँ हेर्न जाने क्रममा ४५ वर्षीय मधुसुदन गोडिया माथि चितुवाले आक्रमण गरेको प्रहरीले जनाएको छ। चौगुर्जी गाउँबाट करिब १०० मिटर पश्चिमतर्फ भएको आक्रमणमा गोडियाको टाउको र दाहिने हातमा चोट लागेको छ।
घाइते गोडियालाई तत्कालै उपचारका लागि बर्दिया जिल्ला अस्पताल पुर्‍याइएको थियो। अस्पताल स्रोतका अनुसार प्राथमिक उपचारपछि उनलाई डिस्चार्ज गरिएको छ र अवस्था सामान्य रहेको बताइएको छ।
स्थानीयवासीमा त्रास फैलिएको छ। वन्यजन्तुको आक्रमण बढ्न थालेपछि सम्बन्धित निकायलाई नियन्त्रण तथा सुरक्षाका लागि पहल गर्न स्थानीयले माग गरेका छन्।